Maandag 13 Maart 2006
Beeld Plus

Michelle Veenemans ’n puik vertolker

Michelle Veenemans
Congoweg, Emmarentia
Low Steyn

Die sopraan Michelle Veenemans is 'n begaafde sangeres, 'n puik vertolker. Dié Michelle Veenemans in concert was hoogs bevredigend op die oor, met heelwat hoogtepunte.

Die aria Martern aller Arten uit Mozart se Die Entführung aus dem Serail en Offenbach se "pop-aria" uit Les contes d'Hoffmann was na verwagting knap uitgevoer. Wat wel verras het, was dié sopraan se uitstekende weergawe van Ebben neandro lontana uit La Wally van Catalani. Veenemans het nog altyd beïndruk as koloratuur-sopraan en in uittreksels uit bel canto-operas, maar in dié gans ander vokale stylsoort het sy eweneens uitgeblink - 'n liriese en dramatiese aanslag vol passie, soos dit hoort, wat 'n mens nie sou kon voorsien nie. Wel gedaan!

Ons ken Veenemans ook al as 'n goeie operette-solis - soos onder meer blyk op haar CD - en in dié afdeling was haar Czardas uit Strauss se Fledermaus die beste.

Moeder Barbara is kostelik in haar vertellings tussendeur, en veel beter as die meeste wat in ons konserte alewig iets móét sê.

Paul Ferreira vaar baie goed as klavierbegeleier, en ook sy ondersteuning van Lizet Smith in werke vir klarinet en klavier van Poulenc en Arnold het sy veelsydigheid ten opsigte van stem en instrument geï llustreer.

Met dié konsert as wegwyser, kan 'n mens uitsien na konserte wat vorentoe deur Hannie Hefer Promotions aangebied word.